من طمع طبع :::

موضوع: من طمع طبع ::: السبت أغسطس 28, 2010 8:24 am

السلااام عليكم ورحمه الله وبركااته

قرييت هالقصه وشفت انه فيها عبر واايد حلووه للكباار والاصغااار .
بســــم الله ونبــــدأ ...

كان يا مكان في قديم الزمان .. ريـال فقير ولكنه غني بأخلاقه
وطيبته .. ومعاملته ويا الناس .. هالـريال اسمه سالم ..

سالم ف يوم من الأيام قرر انه يسافر .. طبعن هوه خاف على عمره
انه يسافر بروحه و السبب الرئيسي للسفر هوه انه يبا يتاجر
فقال بدور حد بيسافر المكان الي انا بسيره .. عشان يخاويني ^^ ..

دور دور وحليله ما حصل إلا واحد غني ومعروف ببطشه و ظلمه للناس
وخاصه الفقارى منهم ما يحبهم يعاملهم جنهم عبيده او خدمه .. هالريال
الخقاق نقدر انقول عنه اسمه سعيد .. سالم سار عند سعيد ووو :

سالم : هلا ياخوي سعيد جيف حالك ؟
سعيد : زهبت عمرك ؟ يبت بيزاتك ؟ لاني ما بعطيك ولا فلس ف الدرب هيه
مب تتحرى عمرك بتسافر وياي يعني خلااص تتحرى عمرك بتنصب عليه ..
سالم ( قافط ) : آأآأآأ يا سعيد الله يهداك شو هالرمسه .. لا ياخوي انا
بس بغيت حد يخاويني ف السفر لا ابا منك لا درهم ولا دينار افا عليك بس ..
سعيد : هيه جان جي السالفه عيل نحن متفقين .. يلا خل نقبض الدرب
سالم : بسم الله توكلنا على الله ...

ايام قبل ماشي سياير .. سالم وحليله حاط اغراضه على ظهره ويمشي
وسعيد راكب ناقته ومرتااح .. والدرب ما يخلى من المخاطر ..

وهم ماشين سعيد وسالم .. سعيد وحليله كان مغفي ( تعبان ) وهوه يمشي ما انتبه
وطاح ف حفره ..

سالم : سعيييد .. سعيييد اتلااحقنيي ..
سعيد : ولييين انته عمي ؟ ما اتجوف ؟ عنبو بعد حفره جدامك خوز عنها
سالم : والله ما ادري ياخوك انا كنت امشي ما جفت عمري الا طايح بهالحفره فر لي الحبل الله يخليك
سعيد : اووف منك .. اندوووك .. اتقبض عدل ..

وفعلن .. سعيد طلع سالم .. وكملوا دربهم .. بس ف السفر محد يرتاح ..
سالم مره ثانيه طاااح ف حفره .. وسعيد طلعه .. بس الثالثه سعيد
طفر من السالفة .. :

سالم : سعيد .. سعيييد .. ساعدني الله يخليك ..
سعيد : انته اييه .. انته ما اذيتنا ؟ ياخي جوف جدامك وانته تمشي
سالم : مادري .. والله ما ادري ياخي كنت امشي وما جفت عمري الا وانا طايح ف هالحفره ( نفس القصه )
سعيد : هيه هيه صح .. انزين ماشي حبل شقايل اطلعك ؟
سالم : ما ادري اتصرف .. مد ايدك خل اتيود وبطلع ..
سعيد : لا لا مابا اوصخ ثياابي .. اتخيل وانا ماد ايدي اتكربعت واتوصخت ثياابي ؟
لا لا ما فيني ..
سالم : يعني والحل ؟ بتخليني اهنيه بروحي ؟ ف هالبر الموحش ؟
سعيد : بعد شو اسويلك .. دام انته مب ويه سفر جيه اتسافر ؟
سالم : ارجوك .. بسوي الي تبااه بس طلعني ..
سعيد : الي اباه ؟
سالم : الي تباه ..
سعيد ( وهوه يضحك ضحكه خبيثه ) : اندوك هالسجينه اباك اتقص عيونك
سالم : شوو ؟ صاحي انته ؟ شو اقص عيوني ؟
سعيد : خلاص عيل حياااك مع السلامه .. انا بكمل الدرب
سالم : وين وين اصبر .. شو اقص عيوني يا سعيد الله يهداك
سعيد : يا اتقص عيونك يا تتعفن ف هالحفره للابد ..
سالم ( يطالع سعيد هالنظرة الي تغمض ) : لا حول ولا قوة الا بالله امري لله .. هات السجينه

وحليله سالم .. ما يدري انه سعيد منقهر من الفقارى لانهم سعيدين ف حياتهم
عكسه تماما.. يحب يعذبهم ف المدينه ويستانس يوم يجوف حالتهم تدهور سواء
ان كان يوم يرفع الاسعار ولا يعذبهم يوم ما يدفعون الديون الي عليهم ..
سالم قص عيونه .. وسعيد كان ناقع من الضحك عليه .. الصراحة هالانسان ما يرحم
ابدا.. ولا في قلبه ذرة رحمه ..

كملوا دربهم .. سعيد يمشي وهوه يغني .. سالم يمشي وهوه يتألم .. يوم كانت عنده
عينين طاح ف الحفره فمابالكم يوم عنده عين وحده ؟ .. طاح ف حفره للمره الرابعه
وعشان يطلعه سعيد طلب منه نفس الطلب :

سعيد : هاه اجوفك مره ثانيه طحت انته ما تتعلم الدرس ؟
سالم ( ساكت )
سعيد : تبا تطلع ؟ سو الي سويته توه هاهاهاهاه ههههههه هاهاهاهاها
سالم : امري لله هات السجين

قص عيونه الثانيه .. وتم بدون عيون .. يعني بالمختصر المفيد عمي ..
وسعيد وهوه يمشي يسويله حركات ويستهل عليه ..وسرق فلوسه وسالم المسكين ما يدري

صاحبنا سالم للاسف للمره الخامسه طاح ف الحفره بعد هوه وحليله ما ينلام لانه
اول مره يسافر بس جوفوا كيف حظه نحس اول مره يسافر وكل هاه يستويله ..

طاح ف الحفره للمره الخامسه وسعيد حتى ما وقف له .. لبسه وكمل دربه وخلاه
.. ف هالحفره .. فهالبر الموحش ..

حل الظلام على سالم وهوه ف الحفره .. وفجاة !! .. وبدون سابق انذار ..
سمع صوت ريح .. هالصوت ياي من ثلاث اتجاااهات .. يا ترى شو هالصوت ؟
صوت همس مصدره بعييد .. الصوت يخرع .. بس صاحبنا سالم اتمالك نفسه
يحاول انه ما يتحرك مووول .. وما يطلع صووت ..

وقف هالصوت فوق الحفره .. طلعوا ثلاث ينانوه .. كل يوم خميس يتيمعون
فوق هالحفره وكل واحد فيهم يقول اخطر سر عنده .. بس سالم عرف انهم
ينانوه فقرر انه ينطب ويسكت وما يطلع ولا صوت ..

اليني الاول : هلا والله بالربع جيف حالكم
اليني الثاني والثالث : اهلين تمام نحن انته شحوالك .؟
اليني الاول : بخير .. هاه جاهزين ؟ تبون الصدق انا هالاسبوع سري بيكتسحكم وبفوز عليكم
اليني الثاني : ههههاااي .. وحيلك انته .. تتحرى محد عنده سر قو الا انته ؟
اليني الثالث : صدقوني اني انا الي بفوز اصلن لا انته ولا هوه تقدرون اتنافسوني..
اليني الاول : انزين انزين فكونا .. يلا منو بيبدا ؟ انا ببدا شرايكم ؟
اليني الثاني والثالث : اوك ابدا ..
اليني الاول : تدرون انه انا اعرف مكان شيره ( شجره ) اذا خذيت ورقه من اوراقها
وحطيتا على اي عوق فيك انشاء الله لو كانت ايدك مقطوعه بترد مره ثانيه ..
ومكان هالشيره كذا وكذا ( صاحبنا سالم حفظ المكان ) هاه شرايكم ف سري ؟
اليني الثاني : سر و سر هاه الي عندك الحين ؟ عيل اسمع انته وياه انا ساحر بنت الملك
مخلنها ما تلبس ثياااب موول هههه كله اتحب تتفصخ ومب ف حاسيتها يعني مخلنها مينونه
وهالسحر ما يخوز عنها الا بالايه رقم كذا كذا ف سورة كذا كذا .. هاه شرايكم ( سالم طبعن حفظ الايه )
اليني الثالث : ابوي انتو اسراركم ما اتاكل عيش اسمعوا .. تدرون اني شليت من كل كنز ف الارض
قطعه ويمعتهم كلهم ف مكان .. يعني كنز مكس بين كل كنوز الارض ف مكان واحد وهالمكان كذا وكذا ( صاحبنا سالم حفظ المكان )
اليني الاول : الصراحه انت ( قصده اليني ا لثالث ) انته الي فزت هالاسبوع .. يلا يا جماعه
نلتقي الاسبوع الياي مب تتاخرون ؟ هيه خلوكم ع الموعد ..

وخلصوا الينانوه موعدهم الاسبوعي .. وسالم حفظ كل كلمة قالوها.. بس للاسف كيف بيطلع من هالحفره ؟
سلم امره لله ورقد .. والصبح ما نش الا على صوت خطاوي الرجاب ( البعران ) .. تم يزاعق .. يا ناس
يا عالم ساعدوني انا اهنيه ف الحفره .. كانت قافله .. متوجها للمدينه الي كانوا سالم وسعيد
بيسيرون لها .. الجماعه ف القافله طلعوا سالم من الحفره .. وقالهم قصته .. ووافقوا انهم يوصلونه
للمدينه بس هوه للاسف رفض انته يسير للمدينه قالهم وصلوني مكان كذا كذا كذا ( مكان الشيره الي اليني قال عنها )
ودوه .. وداوى عمره بورقها .. وعلى طوول رد بصره .. من بعد ما كان عمي .. اداوى بهالشيره
واستوى يجووف ^^ .. وعقب قرر انه يسير لبنت الملك لانه سالم مثل ما تدرون صاحب نخوه وشهامه
ويحب الخير للكل فحب يساعد بنت الملك .. سار القصر ودخلوه على الملك ..تراه اي واحد اونه بيساعد
الاميره لازم الملك يرمسه شخصيا عقب يخلونه يعالجها ... :

سالم : مساك الله بالخير مولاي
الملك : هلا .. انته تدري شو بيصير لك لو ما عالجت بنتي ؟
سالم : لا ؟
الملك : تنقطع رقبتك على طول
( ليش تنقطع رقبته على طول ؟ لانه بنت الملك متفصخه هاليني السبال سحره انه يخلي البنت ما تلبس
ثيااب واذا لبست ثياب تنصرع .. فعسب جيه من غيرة الملك على بنته أمر انه الي ما يعالج بنته تنقطع رقبته
والي يعالجها يتزوجها ويصير الامير .. من غيرته عل بنته يسوي جيه ^ ^ )
سالم ( اتردد بعض الشي ) : ما عندي مشكلة مولاي بس خلني ادش عليها وباذن الله الواحد الاحد بتنشفي
الملك ( وهوه يقول ف قلبه يعني شو انته ا حسن عن غيرك ) : يلا .. يا حراس ودوه الحجره

وبالفعل دش سالم وقرى الايات الي قالها اليني وبطل مفعول السحر وردت بنت الامير مثل ما كانت عليه قبل

الملك : ماشاء الله عليك يا سالم والله اثبت انك ريـال وولد ريـال الصراحه ما اتوقعت انك تشفي بنتي الوحيده
يزاك الله خير ..
سالم : انا ما سويت شي رب العالمين شفاها ..
الملك : الحمدلله الحمدلله ..
سالم : انزين يا مولاي انته للحين على وعدك صح ؟
الملك ( وهوه متوهق ) : اي وعد ؟
سالم : اني اذا شفيت بنتك بصير الامير لاه ؟
الملك : اممم يا سالم تدري انته انسان فقير وغيرك من عيال الاغنيا
الي يحاولون يكسبون مودتي ومودت بنتي عشان يصيرون اغنيا .. فسمحلي
ما اقدر اعطي منصب الامير لواحد فقير ما عنده فلس واحد يصرفه على الشعب ..
سالم : يعني هذا عيبي الوحيد ؟ اني فقير ؟
الملك : للاسف هيه .. يا حرس عطوه اميه دينار ووصلوا برع ..

وطلع سالم وحليله من قصر الملك حزييين جدا .. وهو يالس ع النهر اتذكر
كلام اليني الثالث الي يقول إنه سوا مكس بين كل كنووز العالم .. فقرر
انه يسير هالمكان واكيد انه سالم حافظنه ^^ ..

وفعلن .. سار المكان .. شل الكنز بكبره .. ورد فيه المدينه .. وسار عند الملك :

سالم : مولاي .. مثل ما اتجوف انا الحينه من اغنى اغنياء المدينه.. اعتقد انه مالك
عذر انك اتزوجني بنتك الاميره .. ( على فكره سالم ترى بنت الملك دشت ف خاطره يوم جافها )
الملك ( متوهق ما يبا يبين للناس انه مش قد كلمته ) : آأآأآا خلاص يا سالم انته اثبت
للكل انك ريال ع قد كلمتك وانا اهنيه جدام الكل اوافق على زواجك من بنتي الاميره ^^ .

وعرس سالم .. واستوى الأمير .. ومرت الايااام .. وكان سالم كل يوم يمعه يوزع بيزات على الفقارى
ف يوم من الايااام .. كان يوزع البيزات على الفقارى جاف ويه مألوف يا ترى منو هاه ؟ هييييه
سعيد .. الي خلاني اقطع عيوني وخلاني بروحي ف الحفره ونهبني .. ما عليه .. يا حرااااس هاتولي هالريال
الي واقف اهناك ..

الحراس ساروا ويابو سعيد داخل القصر .. اول ما دش سعيد جاف سالم بطل عيونه و :

سالم : هلا هلا .. هلا فيك سعيد شخبارك ؟
سعيد ( دهشة جدن شديده ) : آأآأ بخير ..
سالم : خير يا سعيد .. غريبه احيدك رياال غني وتاجر جيه ياي تاخذ من صدقة الفقارى ؟
سعيد : والله يا سالم .. تدري من بعد الي استوى بيني وبينك .. وانا ع حدود المدينه
اتعرضت للسرقة من قبل قطاع طرق .. سرقوني ما خلولي فلس .. ومن بعدها وان على هالحال
سالم ( سعيد غمضه ): امممم والله ياخوي سعيد شوف ان الله يمهل ولا يهمل .. حصل خير انشاء الله عاد
اتكون اتعلمت من هالدرس .. وانا مستعد اعطيك نص الي املكه شرايك ؟
سعيد ( يسوي عمره مش مهتم ) : بس النص ؟ انزين شررايك يا سالم تعطيني الي عندك كله وانا بتاجر
فيه وجيه بتكون ساعدتني .. وساعدت عمرك لاني انشاء الله بدبل الربح ..
سالم ( ظنه ما خاب في سعيد النصاب ) : والفقارى شو بعطيهم ؟
سعيد : شو تبابهم ... ما بينفعوونك ف شي هايل ..
سالم : اسمحلي .. وانا الي ع بالي انك تغيرت .. يا حراس طلعوا برع .. مابا اجوفه مره ثانيه

من بعد ما راغوه قعد سعيد عند باب القصر يفكر .. يعني جوف كيف حتى وهوه عفانا الله على هالحال
يبا ينصب ويحتال .. جوف كيف الطمع شو يسوي ف الانسان ..

سعيد ( يكلم نفسه عند باب القصر ) : اندوك انته .. سالم هالحكيان الي كان عمي استوى امير المدينه
.. يا ترى شو السبب ؟ ..... وقعد سعيد يفكر ويفكر ..

آخر شي قرر انه يعوود للمدينه الي هوه يا منها .. وهو ف الدرب .. جاف الحفره الي خلا سعيد فيها بروحه
يوم خلاه خلاه يقص عيونه الثنتين وقال :

سعيد ( يكلم نفسه ) : هييييه وانا اقول شسالفه .. اكيد يوم كان ف هالحفره ياله مارد المصباح وعطاه كل
الي يتمناااه .. او انفتحت له مغارة علي بابا .. خل اطب واجرب حظي ..

سعيد قص عيونه الثنتين .. ونط ف الحفره واتريا حظه .. عل و عسى ييله اليني الي على قولته لبى مطالب
سالم كلها ..

قعد سعيد يتريا ويتريا ويتريا .. ليين ماياله صوت الهمس الي ينسمع من بعيييد .. وصوت الريح .. طبعن منو هايل ؟
ربعنا الينانوه الثلاثه موعدهم الاسبوووعي اليوم الخميس يا جماعه .. وصاحبنا سعيد ف الحفره فرحان
يتحراهم اليني الي لابس وزار وحاط ع راسه عمامه فقعد مكانه مستانس .. وفجاه سمع صرييخ ..

اليني الاول ( معصب ) : يالسبلان يالحمير .. والله انكم مب ينانوه .. سيروا زولوا هاي يلسه نيلس فيها
ويا بعض اتسيرون اتفتنون يالفتانين ؟
اليني الثاني : وانا بعد تتحروني بقعد وياكم من بعد الي سويتوا وانا ع بالي انكم ربعي بس صدق حسافه
اليني الثالث : لا عاد انا الي ميت فيكم الحينه .. سيروا ولوا .. طلعتوا خونه .. هاه ويهي جان يلست وياكم
مره ثانيه ..

سعيد يوم سمعهم يضاربون عاد صخت فيه الدنيا ومات من الخرعه .. الظاهر اليني بو وزار الي حاط ع راسه
عمامه محد .. ماشي الا ينانوه محرجين اهنيه ..

اليني الاول : عيل يالسبلان .. سرت بشل ورقة من الشيره عسب انصب فيها على واحد من البشر .. حرام انه الشيره
منتفه تنتييف .. ورقة وحده ما حصلت ..
اليني الثاني : عيل اسسمع .. انا نصبت على واحد من البشر بعت له علاااج البنت المسحوره .. اخر شي طلعت من البداية حد معالجنها .. والحينه هالريال يبا يصيدني ولا ماجر ينانوه ثانيين عشان يصيدوني
اليني الثالث : اتهون .. اتهوون .. انا شقى عمري .. من ستين سنة وانا ايمع هالكنز آخرتها حتى جرخي حمر ما شي .. منهوب نهب ولا بعد اشكره .. انا زارع كم من وردة فوقه .. قاصينها قصصص .. صدق ما تستحون على ويهكم ..

صاحبنا سعيد ف الحفره من الخرعه طلع صوت خفيف .. انتبهوله ربعنا الينانوه ...

اليني الاول : سمعتوا الي انا سمعته ؟
اليني الثاني والثالث : هيه !
اليني الاول : لحظة خل اجيك ف الحفره ..

وجان يتافجؤون بسعيد قاعد .. طبعن سعيد ما يجووف ..

اليني الاول : انته يعني السبال يالس تجسس علينا .. يالربع عندكم اياااه ..

وربعنا ما رحموا سعيد نتفوووه تنتيييف .. وتوووته توته خلصت الحتوته .. يا ترى حلوه ولا فتفووته ؟

هالقصه نتعلم منها القناعه وانه الواحد ما يطمع ولكن يرضى بالي عنده ^^ ..

للامااانه منقوووووووله study